HSA Day observed

The 82nd HSA Day ursûn taka inser:
 "Thiemna le varna nei ding chun inruolsiekna lungril ei nei a pawimaw"~Chief Guest Dr. Chaltonlien Amo

Rengkai, October 3, 2021, Virthli (ONP): HSA CCpur JHQ huoihawtnain October 3, 2021 zîng dâr 11:00 AM khan
 "Day of Reparation" thupuia hmangin HL Daka Memorial Hall, HSA Campus, Rengkai-ah Hmar Students' 
Association (HSA) a kum 82 tling lâwmna hunser ursûn takin hmang a nih. Hi huna hin Chief Guest-in 
Dr. Chaltonlien Amo, MLA, 55-Tipaimukh A/C a ṭhang a, Guest of Honour dinga fiel Pi Lalṭhazam,
CEO, ADC CCpur a hung ṭhang thei naw leiin, a aiin Pu Timothy Z. Zote a ṭhang a, Functional President-in
 Pu Vanlallien Khaute, Vice-President,ATSUM hmang a ni a.Chief Host dinga fiel Pu Rothanglien Khawbung, 
President, HSA GHQ khawm hi hunser a hung uop thei ve naw leiin, a aiin Pu H.Buonsanglien Inbuon a ṭhang. 
Special invitees-in KSO CCpur, ZSF GHQ, MZP Manipur hai an ṭhang.

Hun hmasa tieng Tv. Joshua L. Amo, General Secretary, HSA CCpur JHQ keiṭhuoinain, HSA Campus-ah HSA puonzâr 
keipharna hunser hmang a ni a, Chief Guest- Dr. Chaltonlien Amo, Tipaimukh MLA-in HSA Flag keipharna neiin,
 HSA CCPur Govt. College Unit ha'n hnam lâm mâwi tak inentirna an nei.

Hun hmangna hi Tv. Zosanglur Zote le Nk. Gloria Songate ha'n thiem takin an keiṭhuoi a, Pastor Eloy Zairemthang Ṭaite-in
 ṭawngṭaia hun a hawng zoin, Pu Richard Lalṭanpuia, Convenor, HSA Day Celebration Committee-in lâwm lûtna thucha
hrilna neiin Finny Lalthansiama, Secretary, HSA Day Celebration Committee-in khuollien hai châwimâwina thilpêk inhlânna a nei.  

Hi huna Chief Guest Dr. Chaltonlien Amo-in thu a hrilnaa chun, 'HSA-in kum 82 hmêl a hmu el ta chu lâwmum a ti a, thiemna le 
varna nei ding chun inruolsiekna lungril ei nei a pawimaw thu hai hrilin, ieng sin khawm thaw ding ni inla, thiemna nei a ṭûl 
tâkzie thu le lekha thiem hlutzie uor takin a hril. A hril nâwk peina a chun, inchûklaihai chu a hming ringawta lekha inchûktu
ni lo a, hlawtlingna chang ding chun tumrûna, taimâkna le tuorselna hai nei a ṭûl a, vawisûna inchûklaihai chu ram le hnam ta 
dinga mi ṭangkâi le sawr tlâk ni tum seng dingin chona le infûina thu ṭha tak tak a hril tâwl.'

Rev. Joseph R. Joute, Advisor, HSA CCpur JHQ a'nthawkin gospel message ngaithlâk a ni a,  Pu Jeffrey Saihmang, President, HSA 
CCpur JHQ-in lâwm thu hrilna a nei zoin, Pastor Lalsandam-in Pathien kuoma ṭawngṭaiin hun a khâr.

HSA Day hmang sûng hin hla saktu thiem tak tak ha'n hla le rimâwi chi hrang hrang hmangin mipui fê khâwmhai 
an inâwi a, hlim le lâwm takin The 82nd HSA Day chu hmang zo a lo ni tah.